9.1 Þróaðir verði traustir innviðir, sjálfbærir og sveigjanlegir, hvort sem er staðbundnir eða yfir landamæri, í því skyni að styðja við efnahagsþróun og velmegun þar sem lögð verði áhersla á jafnt aðgengi á viðráðanlegu verði fyrir alla.
9.2 Stuðlað verði að sjálfbærri iðnþróun fyrir alla og eigi síðar en árið 2030 hafi hlutur iðnaðar í atvinnulífi og vergri landsframleiðslu aukist verulega í ljósi aðstæðna heima fyrir og tvöfaldast í þeim þróunarlöndum sem skemmst eru á veg komin.
9.3 Aukið verði aðgengi lítilla iðnfyrirtækja og annars konar fyrirtækja, einkum í þróunarlöndum, að fjármálaþjónustu, meðal annars að hagstæðum lánum. Einnig verði þáttur þeirra í verðmætakeðjum og á mörkuðum aukinn.
9.4 Eigi síðar en árið 2030 verði innviðir styrktir og atvinnugreinar endurskipulagðar til að gera þær sjálfbærar, nýting auðlinda verði skilvirkari og í auknum mæli innleiði hvert og eitt land tækni og umhverfisvæna verkferla eftir getu.
9.5 Vísindarannsóknir verði efldar og tæknigeta atvinnugreina í öllum löndum endurbætt, þar á meðal í þróunarlöndum. Eigi síðar en árið 2030 verði ýtt undir nýsköpun og fjölgað störfum við rannsóknir og þróun fyrir hverja milljón íbúa, auk þess sem útgjöld til rannsókna og þróunar hins opinbera og einkageirans verði aukin.
9.A Stuðlað verði að sjálfbærri uppbyggingu innviða í þróunarlöndum með sveigjanleika að viðmiði, auknum fjárhagsstuðningi og tæknilegum stuðningi við Afríkuríki, þróunarlönd sem eru skemmst á veg komin, landlukt þróunarlönd og þróunarlönd sem eru smáeyríki.
9.B Stutt verði við tækniþróun, rannsóknir og nýsköpun í þróunarlöndum, meðal annars með því að festa í sessi stefnumótandi umhverfi sem stuðlar til dæmis að fjölbreyttu atvinnulífi og virðisauka.
9.C Aðgengi að upplýsinga- og fjarskiptatækni verði aukið verulega og lagt kapp á að almenningur hafi aðgang að netinu á viðráðanlegu verði í þeim þróunarlöndum sem eru skemmst á veg komin.
Ítarefni um markmið 9
Það þarf að efla sjálfbæran iðnað og halda áfram að fjárfesta í þeim grunninnviðum, nýsköpun og rannsóknum sem leggja grunninn að langtíma efnahagsþróun. Fjárfesting í rannsóknum og þróun í heiminum hefur aukist sem og fjármögnum á efnahagslegum innviðum í þróunarríkjum. Auk þess hefur umfang á mengandi kolefnislosunar dregist saman.
Samhliða hafa spennandi framfarir átt sér stað í útbreiðslu á nettengingum. Þrátt fyrir það hefur aukning í framleiðslu staðið í stað eða dregist saman. Einnig er iðnvæðing í afar fátækum ríkjum er enn of hægfara. Framleiðslustörf leika lykilhlutverk innan þróunarríkja í að tryggja nægar tekjur og draga úr fátækt.
Bættur aðgangur smáiðnaðar að fjármálaþjónustu gæti bjargað alþjóðahagkerfinu
Smáiðnaður og litlir framleiðendur eru afar mikilvægir vinnuveitendur í þróunarríkjum og í nýmarkaðslöndum. Atvinnustarfsemi af því tagi spilar mikilvægt hlutverk í tekjuöflun og baráttunni gegn fátækt.
Á hinn bóginn stendur smáiðnaði og litlum framleiðendum í þróunarríkjum og nýmarkaðslöndum efnahagsleg ógn af smæð þeirra og takmarkaðri getu til eigin viðspyrnu. Þessi umræddu ríki hafa ekki burði til að glíma við ófyrirséð áföll eins og kreppu án mikillar aðstoðar frá hinu opinbera.
Aðgangur að lánum er sérstaklega mikilvægur fyrir lítil fyrirtæki til að þau geti eflt samkeppnishæfni sína. Með þeim hætti geta ríki tekið fullan þátt bæði í svæðisbundinni virðiskeðju sem og heimsvirðiskeðjunni.
Staðan á Íslandi
Hér má finna umfjöllun um heimsmarkmið númer níu.
Helstu áskoranir:
- Nýsköpun í öllum atvinnugreinum.
- Efling vísindarannsókna.
- Efling innviða í samgöngum og ferðaþjónustu.
Fjárfestingar í innviðum, svo sem samgöngum, áveitum, orku, upplýsinga- og hugbúnaðartækni, eru mikilvægar til þess að ná fram markmiðum um sjálfbæra þróun. Meginmarkmið stefnumótandi áætlana ríkis og sveitarfélaga hverfast að miklu leyti um að innviðir landsins verði öruggir, áreiðanlegir, sjálfbærir og viðnámsþolnir. Grunninnviðir eru lykill að samkeppnishæfni landsins, samkeppnishæfni atvinnulífsins, þróun byggðarlaga og almennri félagslegri velferð íbúa.
Ísland er eitt dreifbýlasta land Evrópu með aðeins um 3,4 íbúa á hvern á ferkílómetra, samanborið við um 116 íbúa á hvern ferkílómetra innan ríkja Evrópusambandsins. Uppbygging og viðhald innviða er því krefjandi verkefni vegna þess að kostnaður dreifist á tiltölulega fáar hendur og íslenskt veðurfar reynir talsvert á innviði landsins. Aukið álag og aukin umsvif tengd almennum hagvexti og hröðum vexti í íslenskri ferðaþjónustu hefur haft áhrif á þjónustu, viðhald og rekstur innviðauppbyggingar á flestum sviðum.
Innviðir rannsókna, þróunar og nýsköpunar á Íslandi eru almennt góðir og sjálfbær þróun er grunnstef í stefnu stjórnvalda. Aðgengi fyrirtækja að almennri fjármálaþjónustu er almennt gott.
Ísland á alþjóðlegum vettvangi
Styrkleikar Íslands sem hvað best nýtast þróunarlöndum til atvinnuuppbyggingar og styrkingar innviða eru á sviði sjávarútvegs og orkunýtingar. Þessari þekkingu er meðal annars miðlað í gegnum Háskóla GRÓ (áður Háskólar Sameinuðu þjóðanna) á Íslandi en þeir skólar eru dæmi um grunnstofnanir sem yfirfæra bestu fáanlegu þekkingu á sínum sérsviðum til samstarfsríkja Íslands í þróunarlöndum.
Markmið Jarðhitaskólans, sem hýstur er hjá Orkustofnun, er að veita ungum sérfræðingum frá þróunarlöndum sérhæfða þjálfun í rannsóknum og nýtingu jarðvarma. Sjávarútvegsskólinn er hýstur hjá Hafrannsóknastofnun en markmið hans er að efla sérfræðiþekkingu í sjávarútvegi og fiskveiðum í þróunarlöndum.
