Störf Iðnþróunarstofnunarinnar í stuttu máli: Að ýta undir framfarir í iðnaði í þróunarríkjum með því að veita tæknilega aðstoð, ráðgjafarþjónustu og þjálfun.
Iðnþróunarstofnun SÞ (The United Nations Industrial Development Organization – UNIDO) er sérhæfð stofnun innan Sameinuðu þjóðanna sem leggur áherslu á að stuðla að, virkja og flýta fyrir iðnþróun. UNIDO var stofnuð árið 1966 og eru aðalskrifstofur stofnunarinnar staðsettar í Vín ásamt nokkrum öðrum stofnunum SÞ. Stefna UNIDO endurspeglast aðallega á heimsmarkmiði númer 9: Nýsköpun og uppbygging: „Byggja upp viðnámsþolna innviði fyrir alla, stuðla að sjálfbærri iðnvæðingu og hlúa að nýsköpun“, en stofnunin styður við öll heimsmarkmið Sameinuðu þjóðanna um sjálfbæra þróun.
Verkefni stofnunarinnar einbeita sér að þremur megináhersluatriðum:
- að veita stuðning við sjálfbæra birgðakeðju, þannig að framleiðendur þróunarríkja fái sanngjarnan samning og að fágætar auðlindir verði varðveittar,
- að takmarka loftslagsbreytingar með endurnýjanlegri orku og orkunýtingu til að draga úr losun gróðurhúsalofttegunda í iðnaði,
- að binda enda á hungur með því að draga úr uppskerutapi og þróa virðiskeðjur í landbúnaði.
Öll þrjú áhersluatriðin fela í sér starfsemi sem stuðlar að atvinnusköpun.
Framtíðarsýn UNIDO er heimur án fátæktar og hungurs, þar sem iðnaður keyrir hagkerfið, bætir lífskjör og varðveitir lífvænlegt umhverfi fyrir núverandi og komandi kynslóðir. UNIDO styður 173 aðildarríki sín með fjórum skylduverkefnum: Tæknilegri samvinnu, aðgerðamiðuðum rannsóknum og stefnumótandi ráðgjöf, starfsemi sem tengist stöðlun og stöðlum og að hlúa að samstarfi um þekkingar- og tækniyfirfærslu. Meigináhersluatriðin einbeita sér svo að eftirfarandi þemum: að deila tækni og þekkingu, stafræn væðing, efling fjárfestinga, þjálfun og færni, hringrásarhagkerfi og efnahagsleg valdefling kvenna.
Heimildir:
https://www.unido.org/about-us/who-we-are
https://www.unido.org/our-priorities
https://www.unido.org/our-priorities/sustainable-supply-chains
https://www.unido.org/our-priorities/climate-action
https://www.unido.org/our-priorities/ending-hunger
https://www.unido.org/about-us/member-states
https://treaties.un.org/Pages/ViewDetails.aspx?src=TREATY&mtdsg_no=X-9&chapter=10&clang=_en