United Nations Volunteers (UNV) er sjálfboðaliðaáætlun Sameinuðu þjóðanna. Í gegnum UNV starfar fólk með stofnunum SÞ að verkefnum sem tengjast meðal annars friði, þróun, mannúðarmálum og sjálfbærri þróun víðs vegar um heiminn.
Sjálfboðaliðaverkefni geta verið alþjóðleg eða innan heimalands og einnig eru í boði fjarverkefni. Kröfur um menntun, starfsreynslu og tungumál fara eftir eðli hvers verkefnis.
UNV býður upp á mismunandi flokka verkefna eftir reynslu umsækjenda, allt frá verkefnum sem krefjast lítillar eða engrar starfsreynslu til sérfræðiverkefna fyrir fólk með margra ára reynslu. Almennt geta einstaklingar á aldrinum 18–80 ára sótt um verkefni hjá UNV, en nánari skilyrði koma fram í hverri auglýsingu.
UN Volunteers þurfa meðal annars að vera tilbúnir til að starfa í fjölmenningarlegu umhverfi, sýna skuldbindingu við gildi Sameinuðu þjóðanna og sjálfboðaliðastarfs og geta lagað sig að ólíkum aðstæðum.
UN Volunteers fá ekki laun í hefðbundnum skilningi. Eftir tegund og staðsetningu verkefnis geta þeir hins vegar fengið framfærslustyrk og önnur réttindi, svo sem ferðakostnað, tryggingar, orlof og sérstakar greiðslur við upphaf eða lok verkefnis.
Laus sjálfboðaliðaverkefni eru auglýst á vef UNV. Umsækjendur stofna þar prófíl í Global Talent Pool og geta sótt um verkefni sem hæfa menntun þeirra, reynslu og áhugasviði.
Starfsnám
Starfsnám hjá Sameinuðu þjóðunum er auglýst sérstaklega af einstökum stofnunum og skrifstofum SÞ. Kröfur, lengd og fyrirkomulag starfsnáms eru mismunandi eftir stofnun og starfstöð.
Stofnanir Sameinuðu þjóðanna í UN City í Kaupmannahöfn auglýsa einnig reglulega starfsnám og sum þeirra beinast sérstaklega að nemendum eða nýútskrifuðum frá Norðurlöndunum. Slík tækifæri geta því verið sérstaklega áhugaverð fyrir íslenska umsækjendur. Þar starfa meðal annars norrænar skrifstofur og starfsstöðvar stofnana á borð við UNFPA, UNDP og WFP.
UNV auglýsir einnig eigin starfsnám og störf í gegnum ráðningarkerfi Þróunaráætlunar Sameinuðu þjóðanna (UNDP).