Norrænt samstarf
Systurfélög Félags Sameinuðu þjóðanna á Norðurlöndunum eru mjög öflug og Félag Sameinuðu þjóðanna á í góðu samstarfi við þau. Samráðsfundir eru haldnir meðal félaganna árlega þar sem skipst er á hugmyndum enda fer mikið starf fram hjá félögunum þar sem starfa samtals um fjörutíu manns í fullu starfi.
Öll félögin halda úti heimasíðu og eru þær eftirfarandi:
- Finnland – www.ykliitto.fi
- Danmörk – www.fnforbundet.dk
- Noregur – www.fn.no
- Svíþjóð – www.fn.se
Evrópusamstarf
Evrópusamstarf hefur einnig verið farsælt en á þeim vettvangi höfðu félög Sameinuðu þjóðanna í Evrópu lengi starfað undir merkjum UNA-EU Liaison Group.
Í ársbyrjun 2007 var svo samþykkt að efla og skýra formið á samstarfinu frekar og var þá tekið upp nýtt nafn á samstarfshópnum: UNA Europe Network.
Haldnir er fundir á tveggja ára fresti, ýmist í Genf eða Brussel.
WFUNA
WFUNA, World Federation of United Nations Associations, eru alþjóðleg samtök félaga Sameinuðu þjóðanna. Samtökin vinna að því að efla Sameinuðu þjóðirnar, auka þekkingu almennings á starfi þeirra og skapa vettvang fyrir þátttöku borgarasamfélagsins í alþjóðlegu samstarfi. Samtökin voru stofnuð 1946, eða ári eftir stofnun Sameinuðu þjóðanna. Félag Sameinuðu þjóðanna á Íslandi er aðili að WFUNA og hefur verið frá 1948, en félög Sameinuðu þjóðanna má nú finna í um 100 ríkjum víða um heim.
Á heimsþingi samtakanna í Genf í ágúst 2026 var framkvæmdastjóri FSÞ á Íslandi, Vala Karen Viðarsdóttir, kosin varaforseti til næstu sex ára. Slík heimsþing eru haldin á þriggja ára fresti.
IceMUN
Undirfélag Félags Sameinuðu þjóðanna, Icelandic Model United Nation (IceMUN), vann lengi mikilvægt hlutverk í því að mennta háskólanema um starfsemi hinna ýmsu stofnana Sameinuðu þjóðanna.
Model United Nations (MUN) er vettvangur þar sem nemendur koma saman og setja á svið starfsemi helstu stofnanna Sameinuðu þjóðanna á sem raunverulegastan hátt og takast á við aðkallandi vandamál í alþjóðasamfélaginu.
Þátttakendum er deilt niður á ákveðin lönd og eru því sendifulltrúar þeirra landa. Oftar en ekki hefur allsherjarþing Sameinuðu þjóðanna verið sett á svið og allar formreglur ráðsins virtar, sömuleiðis öryggisráðið.
Næsta MUN ráðstefna fyrir ungt fólk á menntaskólaaldri verður haldin í Reykjavík í haust. Skráning í framkvæmdarhóp fer fram hér.
