1. grein
Markmið Félags Sameinuðu þjóðanna á Íslandi er:
-
- Að auka þekkingu og stuðnings almennings í landinu við Sameinuðu þjóðirnar.
- Að samræma starf þeirra félagasamtaka sem leggja vilja lið sitt til þess að framkvæma hugsjónir Sameinuðu þjóðanna.
- Að stuðla að aukinni samvinnu allra þjóða heims.
- Að stuðla að alþjóðafriði og öryggi.
- Að vinna að því í samvinnu við fjölmiðla og skóla að kynna Íslendingua fyrir hugsjónum og starfsemi Sameinuðu þjóðanna.
2. grein
Í Félagi Sameinuðu þjóðanna á Íslandi geta verið einstaklingar, félög, fyrirtæki og stofnanir, svo sem bókasöfn og skólar.
Heimilt er að kjósa heiðursfélaga úr hópi félagsmanna.
3. grein
Stjórn félagsins ákveður félagsgjöld og getur leitað eftir stuðningi aðila sem styðja vilja stefnumið félagsins.
4. grein
Aðalfundur Félags Sameinuðu þjóðanna á Íslandi skal vera haldinn fyrir 1. júní ár hvert. Aðalfund skal boða skriflega með 14 daga fyrirvara. Rétt á fundarsetu hafa þeir meðlimir sem gerst hafa félagar eigi síðar en mánuði fyrir aðalfund.
Á aðalfundi skal gefin út skýrsla um starfsemi félagsins og fjárhag á liðnu starfsári. Starfsár og reikningsár félagsins er almanaksárið og skulu reikningar félagsins yfirfarnir af löggiltum endurskoðanda.
Aðeins á aðalfundi má bera upp tillögur um breytingar á lögum félagsins og skulu slíkar tillögur kynntar framkvæmdastjórn með viku fyrirvara. Til samþykktar þeirra þarf stuðning 2/3, tveggja þriðju hluta, fundarmanna.
Stjórn félagsins skal skipuð eigi færri en sjö mönnum og eigi fleiri en tólf mönnum. Aðalfundur félagsins ákveður fjölda stjórnarmanna hverju sinni sem skulu kosnir til tveggja ára í senn. Formaður og varaformaður skulu kosnir sérstaklega. Að öðru leyti skiptir stjórnin með sér verkum. Stjórnin skal kosin á aðalfundi annað hvert ár og skal hittast eigi sjaldnar en átta sinnum á ári.
Framkvæmdastjórn skulu skipa formaður, varaformaður og framkvæmdastjóri og skal sinna þeim störfum sem stjórnin felur henni og samkvæmt þessum lögum.
Á aðalfundi skulu kosnir tveir endurskoðendur til tveggja ára.
Endurkosning manna í stjórn er heimil.
Falli atkvæði að jöfnu á stjórnarfundi ræður atkvæði formanns.
Stjórnin boðar til fundar í félaginu þegar henni þykir þörf á eða þegar fimmtíu félagar hið minnsta óska eftir því.
Stjórninni er heimilt að ráða framkvæmdastjóra til að annast daglegan rekstur félagsins.
5. grein
Lögheimili félagsins og varnarþing þess er í Reykjavík. Heimilt er að stofna einstakar deildir félagsins hvar sem er á landinu.