Á fundi Félags Sameinuðu þjóðanna á Íslandi og UN Women með John Aylieff, landstjóra Matvælaáætlunnar Sameinuðu þjóðanna (WFP country representative) í Afganistan þann 21. janúar var vakin athygli á mjög bágri mannréttindastöðu kvenna og barna.
WFP er stærsta stofnun Sameinuðu þjóðanna á sviði matvælaaðstoðar og fæðuöryggis. Um 80% verkefna WFP teljast til neyðar- og mannúðaraðstoðar en 20% sem þróunarsamvinna. WFP er áherslustofnun í mannúðarstarfi Íslands en stjórnvöld vinna einnig með stofnuninni í tvíhliða þróunarsamvinnu. Ísland hlaut lof fyrir sterkan og stöðugan stuðning við stofnunina.
Fundurinn var skipulagður af Félagi Sameinuðu þjóðanna á Íslandi og fulltrúar UN Women og Unicef á Íslandi sóttu fundinn.
Samkvæmt gögnum UN Women eru 78% kvenna í Afganistan utan vinnu og náms, sem hefur leitt til djúprar efnahags- og geðheilbrigðiskreppu. Símtöl til WFP vegna neyðar og andlegs álags hafa aukist um 60%.
Fæðuöryggi fer hratt versnandi. 3,9 milljónir barna þurfa meðferð vegna vannæringar og 1,7 milljónir manna glíma við alvarlegt hungur. Vegna skorts á fjármagni ná hjálparaðgerðir aðeins til hluta þeirra sem þurfa á þeim að halda og milljónir manna sitja eftir án aðstoðar.
Á fundinum ræddu gestir þá staðreynd að alþjóðasamfélagið hafi ekki staðið við loforð sín um stuðning við konur eftir valdarán Talíbana. Þrátt fyrir mjög erfiðar aðstæður heldur starfsfólk Sameinuðu þjóðanna þó haldið áfram störfum sínum, meðal annars með fjarvinnu og sértækum öryggisráðstöfunum.
Frá hægri: Elva Hrönn Hjartardóttir og Stella Samúelsdóttir, UN Women á Íslandi, Birna Þórarinsdóttir, UNICEF á Íslandi, Vala Karen Viðarsdóttir, Félag Sþ, Jónas Haraldsson, UTN, Andreas Hansen, Julie Martinez og John Aylieff, WFP.
