Alþjóðlegt málþing um konur, frið og öryggi

Mánudaginn 10. nóvember, kl. 17:00-19:00 munu utanríkisráðuneytið, Íslandsdeild Norræns tengslanets kvenna í sáttamiðlun (Nordic Women Mediators Network), Jafnréttisskóli GRÓ og Alþjóðamálastofnun við Háskóla Íslands, UN Women Ísland og Félag Sameinuðu þjóðanna á Íslandi standa að alþjóðlegu málþingi um konur, frið og öryggi. Málþingið fer fram í Hátíðarsal Háskóla Íslands, í Aðalbyggingu og er haldið samhliða Heimsþingi kvenleiðtoga sem fram fer í Hörpu dagana 10.–12. nóvember.

Málþingið er haldið í tilefni 25 ára afmælis ályktunar öryggisráðs Sameinuðu þjóðanna númer 1325 um konur frið og öryggi sem samþykkt var árið 2000. Ályktunin markaði tímamót með því að viðurkenna mikilvægi þátttöku kvenna í friðarferlum, vernd þeirra í átökum og samþættingu kynjasjónarmiða í öryggismálum. Því er ætlað að skapa vettvang fyrir alþjóðlegt samtal milli stjórnvalda, fræðasamfélagsins, alþjóðastofnana og grasrótar og staðfestir áframhaldandi forystu Íslands á sviði jafnréttis, friðar og mannréttinda, og sem málsvari ályktunar 1325 undanfarna tvo áratugi. Rúmlega helmingur aðildarríkja Sameinuðu þjóðanna hafa mótað landsáætlun til að framfylgja ályktun 1325 um konur, frið og öryggi. Ísland hefur mótað sína fjórðu landsáætlun og er málþingið liður í framfylgd hennar.

Á málþinginu munu leiðtogar frá átakasvæðum, alþjóðastofnunum, frjálsum félagsamtökum og fræðasamfélagi taka þátt í samræðum um ólíka reynslu af aðkomu kvenna að öryggismálum. Þær munu jafnframt ræða stöðu kvenna innan alþjóðakerfisins út frá ályktuninni sem og þær skuldbindingar sem stuðla að aukinni þátttöku kvenna í fyrirbyggjandi aðgerðum gegn vopnuðum átökum, friðarferlum og friðaruppbyggingu að loknum átökum.

Málþingið er opið öllum en nauðsynlegt er að skrá þátttöku með því að smella á meðfylgjandi hlekk: 25 Years of Women, Peace and Security: Renewed commitments to gender responsive solutions

Góðfúslega mætið vel tímanlega því skrá þarf gesti inn í salinn þar sem málþingið fer fram. Viðburður hefst tímanlega kl. 17:00.

Dagskrá

17:00 – Opnunarávarp, Irma Erlingsdóttir, forstöðumaður Jafnréttisskóla GRÓ við Háskóla Íslands og þátttakandi í tengslaneti norrænna kvenna í sáttamiðlun (Nordic Women Mediators).

17:10 – Setningarræða, Þorgerður Katrín Gunnarsdóttir, utanríkisráðherra Íslands

17:20 – Pallborðsumræður um hlutverk og áhrif kvenna í öryggismálum og friðarferlum

Stjórnandi: Melanne Verveer, forstöðukona fræðaseturs um konur, frið og öryggi við Georgetown háskóla í Bandaríkjunum.

Þátttakendur

◦ Mariana Betsa, aðstoðarutanríkisráðherra Úkraínu

◦ Dr Isata Mahoi, ráðherra jafnréttismála og málefna barna í Síerra Leóne

◦ Sofia Calltorp, framkvæmdastýra skrifstofu UN Women í Genf og yfirmaður mannúðarmála stofnunarinnar

◦ Summer Abu Mughli, sérfræðingur í alþjóðamálum frá An-Najah háskólanum í Palestínu

18:20 – Lokaorð Silja Bára Ómarsdóttir, rektor Háskóla Íslands

18:30–19:00 Móttaka þar sem boðið verður upp á léttar veitingar.

Málþingið er opið öllum en nauðsynlegt er að skrá þátttöku með því að smella á meðfylgjandi hlekk: 25 Years of Women, Peace and Security: Renewed commitments to gender responsive solutions

Hægt verður að fylgjast með málþinginu í streymi hér: https://vimeo.com/event/5488701

80 ár frá stofnun Sameinuðu þjóðanna

Þann 24. október fagna Sameinuðu þjóðirnar (SÞ) 80 ára afmæli sínu. Þegar stofnsáttmáli Sameinuðu þjóðanna tók gildi árið 1945 var markmiðið skýrt: að tryggja frið, mannréttindi og alþjóðlega samvinnu. Á áttatíu árum hafa SÞ gegnt lykilhlutverki í að efla lýðræði, mannréttindi, menntun og sjálfbæra þróun.

Nú standa Sameinuðu þjóðirnar á nýjum tímamótum. Á afmælisárinu fer stofnunin í gegnum umfangsmikið umbótaferli, þar sem áhersla er lögð á að færa starf hennar nær fólki, efla traust og gagnsæi, og gera alþjóðlegt samstarf skilvirkara og sanngjarnara. Aðalframkvæmdastjóri Sameinuðu þjóðanna, António Guterres, hefur kallað eftir „sterkara, nánara og virkara fjölþjóðakerfi“ sem byggir á raunverulegri þátttöku borgara og aukinni rödd ungs fólks og samfélagsins alls.

Stofnanir Sameinuðu þjóðanna hafa haft víðtæk áhrif á daglegt líf fólks, meðal annars í gegnum Alþjóðaheilbrigðismálastofnunina (WHO), Barnahjálp SÞ (UNICEF), Menningarmálastofnun SÞ (UNESCO) og Flóttamannastofnun SÞ (UNHCR). Verkefni þeirra snerta öryggi, menntun, jafnrétti, loftslagsmál og mannúð, og mynda grunn að alþjóðlegu samstarfi um lausnir á sameiginlegum áskorunum.

Á Íslandi hefur Félag Sameinuðu þjóðanna í tæpa átta áratugi unnið að því að efla vitund, fræðslu og þátttöku almennings í alþjóðlegum málum. Félagið vinnur sérstaklega með ungu fólki og borgarasamfélaginu meðal annars með því að kynna heimsmarkmið Sameinuðu þjóðanna og skapa vettvang fyrir samræðu um málefni SÞ, frið og mannréttindi.

Afmælisdagur Sameinuðu þjóðanna ber með sér sterka íslenska tengingu. Kvennafrídagurinn 1975 var haldinn á degi Sameinuðu þjóðanna á ári útnefndu af SÞ sem kvennaár SÞ. Þann dag tengdu íslenskar konur baráttu sína fyrir jafnrétti beint við alþjóðlega baráttu Sameinuðu þjóðanna um réttlæti, frið og samstöðu.

„Barátta íslenskra kvenna hefur frá upphafi verið í takt við þau gildi sem Sameinuðu þjóðirnar standa fyrir. Að jafna tækifæri kynjanna er forsenda friðar, lýðræðis og sjálfbærrar framtíðar. Íslenskar konur sýndu með Kvennafrídeginum að barátta fyrir jafnrétti er hluti af stærra verkefni heimsins, því sem Sameinuðu þjóðirnar voru stofnaðar til að tryggja og verja,“ segir Vala Karen.

Félag Sameinuðu þjóðanna á Íslandi hvetur almenning, skólasamfélög til að nýta afmælið til að íhuga mikilvægi alþjóðlegrar samstöðu, samstarfs og samtals, sérstaklega á tímum aukins vantrausts og spennu í alþjóðamálum.

„Framtíð Sameinuðu þjóðanna ræðst ekki einungis í höfuðstöðvunum í New York, hún ræðst af vilja okkar allra til að standa vörð um gildi friðar, jafnréttis og lýðræðis,“ segir Vala Karen.

Verður heimurinn betri? Ný og spennandi vefsíða!

Verður heimurinn betri? Við þessari spurningu eru margvísleg svör. Mörg okkar lifa lengra, heilbrigðara og innihaldsríkara lífi. En lifnaðarhættir okkar setja álag á jörðina, auk þess sem stríð, átök og faraldrar geysa víða. Þriðjudaginn 14. október gaf Félag Sameinuðu þjóðanna í samstarfi við Miðstöð menntunar- og skólaþjónustu út vefinn verdurheimurinnbetri.is og bók að safna nafni. Vefurinn er hannaður af hönnunarstofunni 14islands fyrir Þróunaráætlun Sameinuðu þjóðanna (UNDP), í miklu samráði við ungt fólk. Við héldum útgáfuhóf í Fjölbrautarskólanum við Ármúla þar sem fjöldi ungs fólks komst skrefinu nær við að svara þessari erfiðu spurningu. Um 100 manns mættu á viðburðinn og gátu nemendur tekið þátt í happdrætti og hlutu þrjú ungmenni vinninga. Hófið endaði með miklu lófaklappi og fengu öll sem mættu pizzu á leiðinni út.

Útgáfuhófið var stórskemmtilegt og þökkum við sérstaklega Báru Karínu og Stefaníu Sigurdís fyrir góða og fræðandi viðburðarstjórn. Hófið var fjölmennt, en starfsfólk og nemendur Fjölbrautarskólans við Ármúla fá sérstakar þakkir fyrir samstarfið.

Verður heimurinn betri? er kennsluverkfæri sem hjálpar ungu fólki að skilja heiminn sem við búum í. Með því að hvetja til ígrundunar um ástandið í heiminum styður verkefnið við fjölbreytta og gagnrýna hugsun, færni sem nýtist í öllum námsgreinum.  Á vefnum má finna fjölbreytt og gagnvirkt efni fyrir skóla, kennara og aðra áhugasama. Efnið byggir á nýjustu tölfræðilegri framsetningu um þróun heimsins og heimsmarkmiðin um sjálfbæra þróun og er ætlað til að vekja til umræða, fræða og hvetja til virkni meðal ungs fólks.

Vefurinn er gagnvirkur og virkar þannig að nemendur safna stigum með því að nota vefinn. Stigin geta þeir síðan notað til þess að kjósa hvaða málefni skiptir þá mestu máli. Verður heimurinn betri? hefur nú þegar vakið mikla lukku og hvetjum við alla skóla til þess að skoða hann.

Vefurinn byggir á samnefndri bók sem nú er gefin út á íslensku í þriðja skiptið og er aðgengileg á vef MMS og FSÞ, en er auk þess send á alla grunn- og framhaldsskóla landsins í október.
Útgáfa vefsins er styrkt af Barna og -menntamálaráðuneytinu og útgáfa bókarinnar er styrkt af Utanríkisráðuneytinu.

Málstofa um Sameinuðu þjóðirnar og mannréttindaráðið á friðarráðstefnu

Málstofan „Protecting Rights Together: The Role of the United Nations in Today’s Human Rights Struggles“, sem fer fram kl. 14:20–15:20 þann 10. október, skoðar mikilvægi sameiginlegrar ábyrgðar ríkja til að viðhalda alþjóðlegum mannréttindum. Þar verður rætt um um hvernig Sameinuðu þjóðirnar og aðrar fjölþjóðlegar stofnanir geta varið og eflt mannréttindi á heimsvísu.

Katja Creutz, frá Finnsku alþjóðamálastofnuninni, flytur inngangserindi en að því loknu munu alþjóðlegir og íslenskir sérfræðingar velta upp spurningum meðal annars um áhrif smærri ríkja innan kerfis Sameinuðu þjóðanna og hvernig þau geta lagt sitt af mörkum til að vernda mannréttindi.

Í pallborðinu taka þátt:

  • Katja Creutz, frá Finnsku alþjóðamálastofnuninni (Finnish Institute of International Affairs)
  • Jessica Stern, fyrrverandi sendiherra Bandaríkjanna fyrir réttindi LGBTQI+ fólks og fræðimaður við Carr-Ryan Center for Human Rights við Harvard Kennedy School
  • Einar Gunnarsson, sendiherra og fastafulltrúi Íslands í Genf
  • Arndís Anna Kristínardóttir Gunnarsdóttir, lögmaður og formaður Siðmenntar

Umræðurnar verða í umsjón Kristjáns Guy Burgess, alþjóðastjórnmálafræðings.

Málstofan, sem setur hlutverk Sameinuðu þjóðanna og mannréttindaráðs Sameinuðu þjóðanna í brennidepil, er hluti af Imagine Forum ráðstefnunni.

Imagine Forum er árleg friðarráðstefna Höfða, friðarseturs Reykjavíkurborgar, Háskóla Íslands og utanríkisráðuneytisins. Þema ráðstefnunnar í ár eru mannréttindi sem grundvöllur varanlegs friðar. Í ár tekur Félag Sameinuðu þjóðanna á Íslandi þátt í skipulagningu ráðstefnunnar.

Fjöldi áhrifafólks og sérfræðinga munu taka þátt í dagskrá ráðstefnunnar en þar má nefna Varsen Aghabekian Shaheen utanríkisráðherra Palestínu, Nazanin Boniadi, leikkonu og mannréttindafrömuð og Vladimir Kara-Murza, sagnfræðing og blaðamann.

Ráðstefnan er vettvangur fyrir opna umræðu um mannréttindi, frið og alþjóðlegt samstarf í samtímanum og tengir saman fræðimenn, stjórnmálafólk og starfandi sérfræðinga á sviði mannréttindamála.

Nánari upplýsingar og dagskrá ráðstefnunnar má finna á heimasíðu hennar:
👉 https://ams.hi.is/en/projects/fridar-radstefnan/

Alþjóðaár jökla: Menntaskólanemar heimsóttu Sólheimajökul

Nemendur úr Menntaskólanum við Sund (MS) og Fjölbrautaskólanum við Ármúla (FÁ) heimsóttu nýverið Sólheimajökul í fylgd leiðsögumanns frá Asgard Beyond. Ferðin var liður í verkefninu Draumur um jökul, sem er samstarf skólanna og Félags Sameinuðu þjóðanna á Íslandi og tileinkað alþjóðlegu ári jökla.

Þrátt fyrir að um 10% af Íslandi séu þakin jöklum eru fáir menntaskólanemendur á Íslandi sem þekkja eða hafa heimsótt jökla. Sem hluti af undirbúningi ferðarinnar hittu nemendurnir Hrafnhildi Hannesdóttir, fagstjóra jöklarannsókna hjá Veðurstofu Íslands, sem sagði nemendunum frá jöklum og jöklarannsóknum á Íslandi. Nemendurnir undirbjuggu einnig handrit og skipulögðu tökur til framleiða efni, myndbönd og ljósmyndir, með það að markmiði að vekja athygli á áhrif loftlagsbreytinga.

Við Sólheimajökul fengu nemendurnir jöklabúnað, brodda, belti, axir og hjálm, áður en þau gengu að jökulsporðinum. Jöklaleiðsögumaðurinn Róbert, sagði nemendunum frá hvernig jöklar verða til og af hverju þeir eru helst á suðaustur hluta landsins. Hann sagði þeim einnig frá þeim miklu breytingum sem orðið hafa á jöklum landsins vegna hlýnunar loftslags.

Verkefnið Draumur um jökul felur ekki aðeins í sér ferð á jökulinn heldur einnig skapandi miðlun. Þrátt fyrir skyn og skúrir á Sólheimajökli, þar sem rignir flesta daga ársins, þá tókst nemendahópnum að safna myndefni á jöklinum, tóku viðtöl við hvort annað en einnig jöklaleiðsögumanninn. Markmiðið er að deila þekkingu um jökla, vekja athygli á áhrifum loftslagsbreytinga og hvetja fleiri til að heimsækja þessar einstöku náttúruperlur – áður en þær hverfa.

Verkefnið hlaut styrk úr Loftslagssjóði ungs fólks.

Model UN ráðstefna fyrir framhaldsskólanemendur

Ungt fólk leiðir loftslagsumræðuna í Model UN

Félag Sameinuðu þjóðanna á Íslandi, Menntavísindasvið Háskóla Íslands og UNESCO-skólinn Kvennaskólinn í Reykjavík hefja samstarfsverkefni þar sem framhaldsskólanemar fá tækifæri til að kynnast heimi alþjóðlegrar diplómasíu – og takast á við eina af stærstu áskorunum samtímans: loftslagsbreytingar.

Verkefnið byggir á aðferðafræði Model UN, þar sem nemendur setja sig í spor fulltrúa aðildarríkja Sameinuðu þjóðanna og ræða lausnir á loftslagsmálum út frá sjónarhorni samvinnu, réttlætis og sjálfbærni. Þannig öðlast þátttakendur innsýn í ákvarðanatökur á alþjóðavettvangi – og upplifa jafnframt hvernig rödd ungs fólks getur haft áhrif.

Hver getur tekið þátt?

Þátttakendur þurfa enga sérstaka reynslu og er þess einungis krafist að nemendur vilji læra meira um starfsemi Sameinuðu þjóðanna.

Viðburðurinn er opinn öllum framhaldsskólanemendum en nemendum í UNESCO-skólum er veittur forgangur.

Skráðu þig til þátttöku hérna: https://forms.office.com/e/ekNb2pjfCm

Af hverju ættir þú að taka þátt?

  • Skemmtilegt tækifæri: Þú færð að prófa þig áfram í ræðuhaldi, samningaviðræðum og samvinnu.
  • Skildu heiminn betur: Þú lærir hvernig Sameinuðu þjóðirnar starfa og hvernig ákvarðanir um stærstu mál samtímans eru teknar.
  • Vertu hluti af lausninni: Þú tekur þátt í að móta hugmyndir og lausnir sem skipta raunverulegu máli.
  • Byggðu tengslanet: Þú hittir jafnaldra úr öðrum skólum, myndar ný vinatengsl og kynnist fólki með svipuð áhugamál.
  • Einstök reynsla fyrir framtíðina: Þessi þátttaka styrkir þig sem borgara og framtíðarleiðtoga – og getur líka verið dýrmæt reynsla í námi og starfi.

Nemendur í Kvennaskólanum mynda sérstakan stýrihóp sem skipuleggur viðburðinn, en nemendum úr öðrum UNESCO-skólum um land allt er boðið að taka þátt. Verkefnið sameinar fræðslu, skapandi vinnu og valdeflingu og leggur áherslu á að gera ungt fólk að virkum þátttakendum og framtíðarleiðtogum í loftslagsumræðu.

Hægt er að kynna sér meira um Model UN hér: IceMUN | Félag Sameinuðu þjóðanna á Íslandi

Áhugasömum er bent á að hafa samband við Pétur Hjörvar, verkefnastjóra hjá Félagi Sameinuðu þjóðanna á petur@un.is eða í gegnum samfélagsmiðla félagsins: Facebook / Instagram

Verkefnið hlaut styrk frá Loftslagssjóði ungs fólks í Reykjavík.

Heimsmarkmiðin nú til á auðlesnu máli

 

Í tilefni fánadags heimsmarkmiðanna gefa Félag Sameinuðu þjóðanna á Íslandi og Miðstöð um auðlesið mál út bækling sem kynnir heimsmarkmiðin á auðlesnu máli. Markmið útgáfunnar er að gera heimsmarkmiðin aðgengilegri og hvetja alla til að leggja sitt af mörkum til að ná árangri í þeim, og hvetja jafnframt aðra til að gera slíkt hið sama.


Auðlesið mál byggir á einfaldri setningagerð, skýrum orðum og stuttum texta, sem auðveldar lesendum að skilja efnið. Með því að kynna heimsmarkmiðin á þennan hátt er tryggt að fleiri geti tekið þátt í því mikilvæga verkefni að skapa sjálfbæra framtíð fyrir öll.
Verkefnið var unnið með styrk frá ÖBÍ réttindasamtökum og þökkum við þeim kærlega fyrir stuðninginn. Einnig er Miðstöð um auðlesið mál þakkað fyrir gott samstarf.


„Það er okkur afar mikilvægt að heimsmarkmiðin séu skýr og aðgengileg fyrir öll, því þau snerta alla íbúa jarðar – ekki síst í ljósi þess bakslags sem við stöndum frammi fyrir. Samvinna og samstarf um að gefa í þegar kemur að heimsmarkmiðunum hefur aldrei verið mikilvægara“ segir Vala Karen Viðarsdóttir, framkvæmdarstjóri Félags Sameinuðu þjóðanna á Íslandi.Bæklingurinn er aðgengilegur á hérna að neðan, en félagið vinnur áfram að enn frekara efni um heimsmarkmiðin á auðlesnu máli. Sérstakt vefsvæði tileinkað þessu efni verður sett upp á næstunni.

Sækja bækling: Heimsmarkmiðin auðlesin

 

Skráning hafin á árlega friðarráðstefnu Höfða friðarseturs

Taktu þátt í umræðunni um mikilvægi þess að standa vörð um mannréttindi til að tryggja varanlegan frið!

Árleg friðarráðstefna Höfða friðarseturs Reykjavíkurborgar og Háskóla Íslands og utanríkisráðuneytisins í samstarfi við Félag Sameinuðu þjóðanna á Íslandi fer fram þann 10. október, frá kl. 10:00 – 17:00.

Á tímum vaxandi einræðishyggju, hnignunar lýðræðis og bakslags í mannréttindum, þar á meðal kynjajafnrétti og réttindum LGBTQI+ fólks, er brýnt að beina athygli að því hvernig slíkt bakslag ógnar grundvallarforsendum friðaruppbyggingar. Þegar réttindi einstaklinga eru skert og jaðarhópar verða fyrir kerfisbundinni mismunun, grafa stjórnvöld undan trausti, félagslegri samheldni og þátttöku almennings í lýðræðislegum ferlum. Verndun mannréttinda er því lykilforsenda þess að tryggja varanlegan og réttlátan frið.

Takmörkuð sæti, skráning fer fram hér

Aðalfyrirlesarar eru meðal annarra:

🎙️ Nazanin Boniadi – heimsþekkt leikkona og mannréttindafrömuður sem leggur áherslu á réttindi kvenna og tjáningarfrelsi í Íran og víðar

🎙️Varsen Aghabekian Shaheen, utanríkisráðherra Palestínu

🎙️ Jessica Stern – fyrrum sérstakur sendifulltrúi Bandaríkjanna í málefnum LGBTQI+ fólks og fræðimaður við Carr-Ryan Center for Human Rights við Harvard Kennedy School

🎙️ Vladimir Kara-Murza – rússneskur blaðamaður og lýðræðissinni sem hefur verið fangelsaður fyrir opinskáa andstöðu sína við einræðishætti og óþreytandi baráttu fyrir pólitísku frelsi

Dagskrá á ensku

10:00 – 10:10 Welcoming words
Pia Hansson, Director of Höfði Reykjavík Peace Centre, University of Iceland

10:10 – 10:30 Keynote Address – Woman, Life, Freedom: Honoring Iceland’s Legacy, Standing with Iran’s Future
Nazanin Boniadi, Actress and Human Rights Activist

10:30 – 11:00 Conversation with Nazanin Boniadi

11:00 – 11:45 Spotlight session with Varsen Aghabekian Shaheen, Minister for Foreign Affairs and Expatriates of the State of Palestine

11:45 – 12:30 Lunch

12:30 – 12:45 Keynote Address – Russia Under Putin — and Beyond

Vladimir Kara-Murza, Russian opposition politician, author, historian and former political prisoner

12:45 – 13:30 Panel discussion

13:30 – 13:45 Coffee Break

13:45 – 14:00 Keynote address

Jessica Stern, Former U.S. Special Envoy to Advance the Human Rights of LGBTQI+ Persons and Senior Fellow at the Carr-Ryan Center for Human Rights at Harvard Kennedy School

14:00 – 14:20 Moderated Youth Dialogue with Jessica Stern

14:20 – 15:20 Protecting Rights Together: The Role of the UN in Today’s Human Rights Struggles

Katja Creutz, Programme Director of the Global Security and Governance research programme at FIIA

Panel discussion

15:20 – 15:30 Coffee Break

15:30 – 16:00 Fireside Chat: Cities as Peacebuilders: Human Rights at the Local Level

16:00 – 16:10 Presenting the Finalists of the Peaceful Towns Art Competition

16:10 – 16:20 Closing Address

Þorgerður Katrín Gunnarsdóttir, Minister for Foreign Affairs

16:20 – 16:30 Closing Reflections

Silja Bára Ómarsdóttir, Rector of the University of Iceland

16:30 Reception

Athugið að þessi frétt er tekin af vef Alþjóðamálastofnunar. 

Staða mannfjöldaþróunar 2025 – Kynning á skýrslu UNFPA

Í tilefni útgáfu skýrslu Mannfjöldasjóðs Sameinuðu þjóðanna um Stöðu mannfjöldaþróunar 2025 (e. State of The World Population), efnir Félag Sameinuðu þjóðanna, í samstarfi við Endósamtökin, með stuðningi utanríkisráðuneytisins til kynningarfundar í Loftskeytastöðinni, þriðjudaginn 16. september kl. 16.30.

Viðburðurinn fer fram á íslensku en pallborðsumræður á ensku. Sýning verður opnuð á viðburðinum með myndum sem prýða skýrsluna og verður létt hressing í boði.
Dagskrá viðburðarins:
Opnun
  • Anna Margrét Hrólfsdóttir, framkvæmdarstjóri Endósamtakanna
  • Marta Birna Baldursdóttir, sérfræðingur á þróunarsamvinnuskrifstofu utanríkisráðuneytisins
  • Klaus Simoni Pedersen, hjá Mannfjöldasjóði Sameinuðu þjóðanna (UNFPA) í New York

Pallborðsumræður

  • Ulla Müller, skrifstofustjóri Norðurlandaskrifstofu Mannfjöldasjóðs Sþ
  • Eydís Sara Óskarsdóttir, varaformaður Endósamtakanna
  • Sunna Kristín Símonardóttir, lektor við félagsfræðideild Háskólans á Akureyri
  • Gústav Adolf Bergmann Sigurbjörnsson, heimspekingur, aðjúnkt við menntavísindasvið Háskóla Íslands

Opnun listasýningar af verkum úr skýrslunni ásamt léttum veitingum

Nánar um skýrsluna 

Undanfarna áratugi hafa orðið miklar framfarir í kyn- og frjósemisréttindum (e. sexual reproductive health rights). Aðgangur að fræðslu og getnaðarvörnum hefur aukist. Einstaklingar eru nú í betri stöðu en áður til að ákveða hvort, hvenær og hversu mörg börn þeir kjósa að eignast.
     Hindranir á leið fólks í að uppfylla vonir og væntingar um barneignir geta tekið á sig margar myndir, en til að skilja þessar hindranir er nauðsynlegt að spyrja. Ef raunveruleiki fólks er ekki skoðaður með tilliti til margslungna áskoranna fólks getur það leitt til stefnumótunar sem er ófullnægjandi eða óviðeigandi.
     UNFPA spurði fólk í 14 löndum, sem samanlagt mynda meira en þriðjung jarðarbúa, hvað það raunverulega vilji þegar kemur að barneignum og framtíð þess – og hvort það telji sig geta látið þessar óskir rætast. Niðurstöðurnar sýna að allt of fáir hafa raunverulegt frelsi þegar kemur að þessari ákvörðunum, sem fyrir flest er ein stærsta ákvörðun lífsins.
     Skýrslan byggir á rannsóknum fyrir sýna að hindranir við að forðast óvænta meðgöngu og hindranir við að stofna fjölskyldu eru í raun þær sömu: efnahagsleg óvissa, kynjamismunun, skortur á stuðningi frá maka og samfélagi, ófullnægjandi kyn- og frjósemisheilbrigðisþjónusta, skortur á aðgengi að þjónustu á borð við viðráðanlega dagvistun eða menntun, og svartsýni um framtíðina.
     Það kemur í ljós að þegar við spyrjum réttu spurninganna sjáum við bæði vandann og lausnina skýrt. Svarið felst í frelsi til barneigna (e. Reproductive agency) –getu einstaklings til að taka frjálsar og upplýstar ákvarðanir um kynlíf, notkun getnaðarvarna og barneignir – hvort, hvenær og með hverjum sem hann vill.
     Fæðingartíðni verður sífellt meira umræðu- og áhyggjuefni. Opinber umræða beinist gjarnan að lækkandi frjósemi, öldrun samfélaga og skorti á vinnuafli. Samt er eitt lykilmál oft fjarverandi í umræðunni: umfram allt stöndum við frammi fyrir hnattrænni krísu í frjósemisfrelsi. Það er meginþema nýjustu skýrslu UNFPA, The Real Fertility Crisis: The Pursuit of Reproductive Agency in a Changing World.

Morgunfundur um Sameinuðu þjóðirnar vel sóttur

Í gær stóð Félag Sameinuðu þjóðanna á Íslandi, í samvinnu við Alþjóðamálastofnun Háskóla Íslands, fyrir umræðufundi í tilefni 80 ára afmælis Sameinuðu þjóðanna.

Viðburðurinn var vel sóttur og einkenndist af breiðum umræðum um áskoranir, möguleika og fyrirséðar breytingar stofnunarinnar í samhengi fortíðar, samtíðar og framtíðar.

Bogi Ágústsson, heiðursfélagi Félags Sameinuðu þjóðanna, stýrði fundinum og setti tóninn með hugleiðingu um mikilvægi SÞ í samtímanum. Að honum loknum tók Guðni Th. Jóhannesson, fyrrverandi forseti Íslands og prófessor í sagnfræði, til máls. Hann fjallaði um viðhorf Íslendinga til Alþjóðadómstólsins í sögulegu samhengi og dró fram þá togstreitu sem oft myndast á milli þjóðlegra og alþjóðlegra hagsmuna, togstreitu sem enn hefur mikið vægi í starfi Sameinuðu þjóðanna.

Helen María Ólafsdóttir, ráðgjafi í öryggis- og þróunarmálum, talaði út frá áratuga reynslu á átakasvæðum og minnti á mikilvægi mannúðar- og öryggisstarfs SÞ, einkum til að vernda borgara við krefjandi aðstæður.

Árni M. Mathiesen fjallaði um áhrif Íslands á vettvangi SÞ og benti á að smæð landsins fylgi ekki aðeins takmarkanir heldur einnig sérstök tækifæri. Hann lagði áherslu á að ef Sameinuðu þjóðirnar væru ekki til þyrfti einfaldlega að finna þær upp.

Þorgerður María Þorbjarnardóttir, formaður Landverndar, beindi sjónum að umhverfis- og loftslagsmálum og hvatti til hugrakkra skrefa í alþjóðlegri samvinnu. Hún lagði áherslu á að samvinna þvert á sérsvið væri lykilatriði til að ná sjálfbærum árangri til lengri tíma.

Viðburðurinn markaði upphaf afmælisárs SÞ og undirstrikaði mikilvægi stofnunarinnar sem lykilvettvangs í alþjóðlegu samstarfi smáríkja á borð við Ísland. Hauststarf Félags Sameinuðu þjóðanna mun einkennast af viðburðum, útgáfu og öðru efni sem liður í því að fagna þessum tímamótum.

Félagið þakkar öllum sérfræðingunum kærlega fyrir þátttökuna og gestum fyrir að fjölmenna á viðburðinn.