Biskupar og aðrir trúarleiðtogar frá Norðurlöndum, Bandaríkjunum og Kanada áttu fund með fræðimönnum, listamönnum og aðgerðarsinnum í loftslagsmálum ásamt fulltrúum frá umhverfissamtökum í Skálholti dagana 8.-10. október. Meðal þátttakenda var fulltrúi frá Umhverfisstofnun Sameinuðu þjóðanna sem er ábyrgur fyrir frumkvæði samtakanna að „Trú í þágu jarðar“.

Þátttakendur ræddu þátt trúar, andlegra viðhorfa og trúarlegrar sannfæringar í að takast á við loftslagsvá og hnignun vistkerfa. Guðmundur Ingi Guðbrandsson umhverfis- og auðlindaráðherra ávarpaði ráðstefnuna.

Þátttakendur lögðu áherslu á eftirfarandi:

• Rætur loftslagsvár, sem mannkyn stendur frammi fyrir, og annarra vandamála sem hindra sjálfbæra þróun, má rekja til mannlegs breyskleika. Tæknin ein dugir ekki til að uppræta það samhengi.
• Trú sem og andleg viðhorf fela í sér boðskap um gæslu sköpunarverksins og verndun náttúrunnar. Um leið hafa þau vekjandi áhrif á fólk og virkja það á grundvelli gildismats.
• Trúarleiðtogar og samfélög leitast við að vernda umhverfið. Engu að síður er þörf fyrir áhrifaríkari tengsl, öflugri samskiptanet og meiri samræmingu svo hægt sé að gera þessa viðleitni markvissa. Raddir allra kynja, ungra kynslóða og frumbyggjahefða þurfa að hljóma sterkt í því samtali og samskiptum sem nauðsynleg eru.
• Sú brýna nauðsyn sem heimtar svör við loftslagsbreytingum og hnignun vistkerfa jarðar krefst þess að leiðtogar fylgi orðum sínum eftir með aðgerðum.
• Trúarleiðtogar njóta trausts og virðingar í samfélögum. Þeir hafa mikilvægu hlutverki að gegna við að leiða og örva þá andlegu og menningarlegu umbreytingu sem þarf til að vernda okkar sameiginlegu heimkyni. Þeir geta verið fyrirmynd, höfðað til dýpstu tilfinninga og blásið kjarki í fólk til aðgerða.
• Á Íslandi ríkir friðsæld og velvild. Landið hefur verið vettvangur fyrir friðar- og umhverfisstarf. Lega landsins við norður-heimskautsbaug setur það í þá víglínu loftslagsbreytinga sem hvað mest mæðir á. Þess vegna er Ísland kjörið til þess að kalla á rökstóla leiðtoga í trúarmálefnum og stjórnmálum. „Bandalag trúar fyrir jörðina“ gæti veitt trúarleiðtogum tækifæri til þess að setja fram sameiginleg markmið um það hvernig eigi að takast á við loftslagsbreytingar og hnignun vistkerfa. Slíkt bandalag gæti eflt samskiptanet trúarsamfélaga og auðveldað þeim að deila sögum sínum, reynslu og þekkingarhefð, og ýtt undir sameiginlegar aðgerðir.

Ráðstefnan var skipulögð af Félagi Sameinuðu þjóðanna á Íslandi, Landgræðslunni og Þjóðkirkjunni ásamt Stofnun Sigurbjörns Einarssonar og  Guðfræðistofnun Háskóla Íslands. Ráðstefnan naut styrkja frá Þjóðkirkjunni og umhverfis- og auðlindaráðuneytinu.

Félag Sameinuðu þjóðanna hélt viðburð á Lýsu þann 7. september sl. um hlutverk og tækifæri sveitarfélaga í innleiðingu og framgangi Heimsmarkmiðanna. Kópavogur og Skaftárhreppur kynntu hvernig þau vinna að Heimsmarkmiðunum og Samtök Sveitarfélaga á Norðurlandi Vestra fjallaði um hvernig samtökin ætla að beita sér fyrir því að Heimsmarkiðin séu höfð til hliðsjónar við stefnumótun í þeim sveitarfélögum sem eiga þar aðild.

Framsögukonur voru:

Auður Finnbogadóttir, verkefnastjóri stefnumótunar hjá Kópavogsbæ

Eva Björk Harðardóttir, Oddviti Skaftárhrepps

Unnur Valborg Hilmarsdóttir,  Framkvæmdastjóri Samtaka Sveitarfélaga á Norðurlandi Vestra

Glærur Evu og Unnar eru fáanlegar með því að ýta hér og glærurnar hennar Auðar eru fáanlegar með því að ýta hér.

Öll helstu íslensku félagasamtökin í mannúðarstarfi og alþjóðlegri þróunarsamvinnu hafa tekið höndum saman, í samstarfi við utanríkisráðnuneyti, að endurvekja átakið ,,Þróunarsamvinna ber ávöxt“ sem fer fram 9.- 13. september nk. og leggja að þessu sinni áherslu á þátttöku fyrirtækja í þróunarsamvinnu.

Íslensk fyrirtæki geta lagt þung lóð á vogarskálar þróunarsamvinnu. Með heimsmarkmiðum Sameinuðu þjóðanna um sjálfbæra þróun er gert skýrt ákall eftir þátttöku fyrirtækja í brýnustu verkefnum á heimsvísu, sem eru meðal annars loftlagsaðgerðir ásamt útrýmingu hungurs og fátæktar í öllum sínum birtingarmyndum. Með því að leggja til þekkingu, búnað, vinnuafl eða fjármuni hafa mörg fyrirtæki breytt lífskjörum fjölda fólks, víðs vegar um heiminn.

Starfsfólk, viðskiptavinir og fjárfestar gera æ meiri kröfur til fyrirtækja um samfélagslega ábyrga hegðun. Með þátttöku í þróunarsamvinnu geta fyrirtæki aukið stolt starfsmanna sinna og gefið viðskiptavinum og fjárfestum skýran og ábyrgan valkost.

Hápunktur átaksins er málstofan Þátttaka fyrirtækja í þróunarsamvinnu sem fer fram á Nauthóli 10. september nk. kl. 9:00-11:30. Markmið málstofunnar er að kynna fyrir fyrirtækjum, stórum sem smáum, tækifæri og ávinning þess að styðja við alþjóðlega þróunarsamvinna. Fyrirtæki á borð við Marel, Íslandsbanka, Te og kaffi og Áveituna á Akureyri koma til með segja frá reynslu sinni af þátttöku í alþjóðlegri þróunarsamvinnu. Á málstofunni verður jafnframt myndband frumsýnt er fjallar um ýmis samstarfstækifæri fyrirtækja og félagasamtaka er starfa á þessum vettvangi.

Að átakinu standa Félag Sameinuðu þjóðanna á Íslandi, Rauði Krossinn, UN Women, UNICEF, SOS barnaþorpin, Barnaheill, ABC barnahjálp, Kristniboðssambandið, Hjálparstarf kirkjunnar, Sól í Tógó og utanríkisráðuneytið.

Við hvetjum alla til að fylgjast með á Facebook síðu átaksins: https://www.facebook.com/throunarsamvinna.ber.avoxt/?ref=bookmarks

Á haustönn 2018 sendi félagið tvo nemendur frá UNESCO skólanetinu á Íslandi á Model UN þing sem haldið var á vegum UNESCO í bænum Cividale de Friuli. Við fengum þær, Unu og Júlíu, sem fóru á vegum Kvennaskólans í Reykjavík og Fjölbrautarskólans í Breiðholti til að segja frá upplifun þeirra af þinginu. Með þeim í för var Óli Kári Ólason kennari við Fjölbrautarskólann í Breiðholti.

————————————————–

Við fengum þann heiður að fá að taka þátt í Model UN fyrir hönd skólanna okkar í nóvember 2018.

Það voru sex nefndir í boði, og við fengum að fara í Öryggisráðið. Nefndin ber ábyrgð á að halda heimsfrið og öryggi. Við fórum sem fulltrúum Miðbaugs-Gíneu og hinir þáttakendurnir voru fulltrúar annara landa sem sitja í rauninni í öryggisráðinu. Það var skipt í tvo umræðuhópa þar sem einn ræddi um sjálfstæði Kúrda og hinn um Íran og kjarnorkusamninginn og hvernig ætti að leysa úr því. Íran kjarnorkusamningurinn er samningur milli Írans og þeirra landa sem eru með neitunarvald í öryggisráðinu og Evrópusambandinu og snýst hann um kjarnorkuvopnaöryggi. Nýlega gengu Bandaríkinn út úr samningnum og umræðuefnið á þinginu var um það hvenig ætti að reyna að bæta það upp. Kúrdistan sem er á milli Írans, Sýrlands og Íraks vildi fá sjálfstæði frá þeim löndum meðal annars vegna ofsókna og öryggisráðið ræddi um það hvort það ætti að veita þeim sitt eigið land eða ekki.

Fundirnir fóru þannig fram að það byrja allir á því að kynna sitt land og svo fórum við í „lobbíisma“ þar sem fulltrúi hvers lands kom með lausnir sem hann reyndi að fá umdirskriftir við frá hinum fulltrúunum og mynda bandalög. Þegar það er búið þá var farið í gegnum allar lausnirnar sem að við komust í gegn um og þær teknar fyrir í umræðu og reynt er að bæta þær. Síðan kýs hver fulltrúi um það hvort lausnirnar komast í gegn eða ekki. Ef að löndin með neitunarvald nýta það eða ef meira en helmingur fulltrúa eru á móti frumvarpinu þá fer það ekki með í stefnuskránna. Til að hafa samband við hina fulltrúanna um frumvarp þá gat maður sent miða til þeirra. Síðan í lokin hittust báðir umræðuhóparnir og tekið var saman hvað var gert og þeir gátu komið fram með sínar tillögur og breytingar. Það var komist að þeirri niðurstöðu að ýta undir það að Bandaríkinn færi aftur inn í Íran kjarnorkusamninginn og að Kúrdar mundu ekki fá sjálfstæði heldur unnið væri að því að auka öryggi þeirra og bæta aðstæður þeirra.

Við lærðum margt af því að fara í Model UN. Eins og til dæmis það að tala fyrir framan aðra, rökræða og upplýsa okkur meira um það sem er að gerast í heiminum. Við fengum að kafa dýpra í ýmis mál þar og fræðast ítarlegra um hvernig ástandið er í öðrum löndum. Eins og til dæmis um stríð, ofsóknir, sjálfstæði, rétt til þess að læra sitt eigið tungumál og margt fleirra. Síðan finnst okkur báðum alltaf gaman að að fá að tjá hugmyndir okkar um hvað væri hægt að gera í ýmsum málum og svo að vinna saman með öðru fólki til þess að komast að sameiginlegri niðurstöðu að því hvernig ætti að leysa vandann. Maður heyrði líka mismunandi skoðanir frá fólki sem er alltaf góður hlutur. Það var skemmtilegt að fá að kynnast nýju fólki sem kom víðs vegar að úr heiminum, sem maður hefði annars ekki kynnst ef það væri ekki fyrir model UN. Maður fékk að sjá og fræðast um það hvernig fundir innan sameinuðu þjóðanna fara fram og auk þess taka beinan þátt í fundunum. Okkur fannst mjög áhugavert að sjá hvernig stjórnmálafundir fara fram og sérstaklega í Sameinuðu þjóðunum þar sem öll ríkin koma saman til þess að ákveða hvað skuli vera gert í tilteknu máli. Model UN hvetur fólk til gagrýnnar hugsunar og hvetur mann til að velta fyrir sér ýmsum hlutum sem eru að gerast í hring um okkur.

Við höldum að allir geti lært eitthvað af því að fara og fundist það skemmtilegt á einn eða annan máta. Þetta var frábært tækifæri fyrir okkur og við erum mjög glaðar yfir því að hafa farið.

Höfundar: Júlía Kristín Kristinsson frá Fjölbrautarskólanum í Breiðholti og Una Dís Ingimarsdóttir frá Kvennaskólanum í Reykjavík

Aðalfundur og ársskýrsla

Þriðjudaginn 28.maí 2019 fór fram aðalfundur Félags Sameinuðu þjóðanna á Íslandi.

Á fundinum var kynnt ársskýrsla félagsins fyrir árin 2017-2018. Í skýrslunni má nálgast ársreikninga félagsins fyrir árin 2017 og 2018, ásamt ávarpi frá formanni og yfirliti yfir verkefni félagsins á árunum 2017- maí 2019. Auk almennra aðalfundarstarfa var fráfarandi formanni Þresti Frey Gylfasyni þakkað fyrir ómetanlegt framlag hans til félagsins en Þröstur hefur verið formaður félagsins síðustu 6 ár.

Ársskýrsla Félags Sameinuðu þjóðanna 2017-2018

Aðalfundur 2019 – fundarglærur

Ný stjórn

Á fundinum var kosin stjórn fyrir starfsárin 2019-2021 og hana skipa:

Formaður: Unnur Brá Konráðsdóttir, fyrrverandi forseti Alþingis.

Aðrir stjórnarmeðlimir:

• Berglind Orradóttir, aðstoðarforstöðumaður landgræðsluskóla Háskóla Sameinuðu þjóðanna
• Hafdís Hrönn Hafsteinsdóttir, lögfræðingur hjá nefnd um eftirlit með lögreglu
• Kristinn Óli Haraldsson ( Króli), listamaður og aktivisti
• María Mjöll Jónsdóttir, deildarstjóri hjá Utanríkisráðuneytinu
• Marta Magnúsdóttir, skátahöfðingi Íslands
• Páll Ásgeir Davíðsson, Rule of Law Desk Coordinator, Transition International
• Pia Hansson, forstöðumaður Alþjóðamálastofnunar Háskóla Íslands
• Þorsteinn Kári Jónsson, verkefnastjóri hjá Marel
• Þórður Kristinsson, kennari við Kvennaskólann í Reykjavík (UNESCO skóli)  og jafnréttisháskóla Sameinuðu þjóðanna

Breytingatillögur aðalfundar á lögum félagsins voru samþykktar: Lög félagsins 

Framtíðarsýn félagsins sem unnin var af og samþykkt af stjórn félagsins haustið 2018 var kynnt: Stefna og framtíðarsýn

Aðalfundur Félags Sameinuðu þjóðanna á Íslandi mun fara fram þriðjudaginn 28.maí kl 17:00. Fundurinn fer fram í Miðstöð Sameinuðu þjóðanna að Laugavegi 176.

Dagskráin inniheldur hefðbundin aðalfundarstörf þar sem skýrsla stjórnar er kynnt, kosið til stjórnar og lagðir verða fram til samþykkis ársreikningar fyrir árið 2017 og 2018, en samkvæmt lögum félagsins fer aðalfundur fram annað hvert ár.

Öll þau sem skráð eru í félagið eru hjartanlega velkomin og eru þau sem sjá sér fært að mæta beðin um að tilkynna þátttöku til starfandi framkvæmdarstjóra, harpa@un.is.

Þann 10.desember 2018 verða liðin 70 ár frá því að allsherjarþing Sameinuðu þjóðanna samþykkti Mannréttindayfirlýsingu Sameinuðu þjóðanna. Hún er skrifuð í lok Síðari Heimstyrjaldarinnar og í þeim tilgangi að stuðla að því að mannkynið þurfi aldrei aftur að ganga í gegnum hörmunga á borð við Helförina. Yfirlýsingin var undirrituð í París þann 10.desember 1948 og var að Eleanor Roosevelt, sem stýrði fyrsta mannréttindaráði Sameinuðu þjóðanna, sem var einn af aðal höfundum hennar.

Þrátt fyrir að heimurinn hafi gengið í gegnum miklar breytingar, sem erfitt var að sjá fyrir við undirritun yfirlýsingarinnar, þá stendur hún ennþá sem sterkur grunnur þegar kemur að því að ávallt skuli tryggja frelsi, jafnræði og virðingu fyrir alla einstaklinga. Þrátt fyrir að vera ekki lagalega bindandi þá hefur yfirlýsingin verið undirstaða helstu alþjóðasamninga um mannréttindi.

Yfirlýsingin stendur saman af 30 greinum (sjá hér)  sem kveða á um mannréttindi sem við öll eigum jafnt tilkall til án tillits til kynþáttar, litarháttar, kynferðis, tungu, trúar, skoðana, þjóðernis, uppruna, eigna, ætternis, eða annarra aðstæðna. Hún er sameiginlegt markmið allra þjóða og ríkja með það fyrir augum að sérhver einstaklingur og allar stofnanir samfélagsins hafi yfirlýsinguna ávallt í huga þegar kemur að stefnumótun og aðgerðum.

Herferðin „Stand up for human rights“ eða #standup4humanrights sem Mannréttindaráð Sameinuðu þjóðanna stendur fyrir í tilefni afmæli Mannréttindayfirlýsingarinnar miðar að því að efla þekkingu almennings um mannréttindi og að beina sjónum okkar að því hvað Mannréttindayfirlýsingin þýðir fyrir okkur hvert og eitt í daglegu lífi. Á heimsíðu herferðarinnar má nálgast mikið af fræðslu efni ásamt frásögum einstaklinga sem staðið hafa vörð um mannréttindi á einn eða annan hátt.

Félag Sameinuðu þjóðanna á Íslandi mun ásamt samráðshóps um mannréttindi halda upp á þennan merka dag með þátttöku í hátíðarfundi á vegum stýrihóps Stjórnarráðsins um mannréttindi sem fram fer í Veröld Vigdísar að morgni 10.desember. Dagskráin er hin glæsilegasta en hún hefst klukkan 9:00 með ávarpi dómsmálaráðherra. Forsætisráðherra slítur svo fundi klukkan 10:50. Dagskránna má nálgast hér og viðburður hefur verið settur upp á Facebook hér.

Þá munu Sameinuðu þjóðirnar bjóða til bíósýningar um kvöldið, en klukkan 20:00 verður í Bíó Paradís sýnd myndin Hreinsunardeildin (The Cleaners) og í lok myndarinnar fara fram umræður með þátttöku áhorfenda. Myndin beinir sjónum af því hvernig internetið er hreinsað af „óæskilegu“ efni. Varpað er fram spurningum í myndinni um hver í raun stjórni því hvaða efni fer á internetið og stýri með því hvernig við hugsum, brot úr myndinni má sjá hér. Umræður fara fram eftir að sýningu myndarinnar lýkur og þar hafa framsögu Heiðdís Lilja Magnúsdóttir lögfræðingur hjá fjölmiðlanefnd og Smári McCarthy alþingismaður. Aðgangur er ókeypis og allir velkomnir.

Félag Sameinuðu þjóðanna á Íslandi fagnaði Degi Sameinuðu þjóðanna 2018 með þátttöku í tveimur Heimsmarkmiða viðburðum.

Í Salaskóla í Kópavogi stóð félagið, í samstarfi við mennta- og menningarmálaráðuneytið og Salaskóla, fyrir Heimsins stærstu kennslustund (e. Worlds largest lesson) sem er árlegt átak sem snýr að kennslu á Heimsmarkmiðunum og er styrkt af UNESCO og UNICEF. Þar tóku þátt nemendur úr efstu bekkjum Salaskóla og Landakotsskóla, en þeir skólar ásamt Fjölbrautaskólanum í Breiðholti og Kvennaskólanum í Reykjavík eru í fyrstu skólar sem taka þátt í skólaneti UNESCO á Íslandi. Viðburðurinn hófst á  hvatningarorðum frá frú Elizu Reid forsetafrú og verndara Félags Sameinuðu þjóðanna á Íslandi.  Að þeim loknum hófst kennslustundin sem gekk út á það að nemendur hugleiddu og ræddum um hvaða styrki og hæfileika þau búa yfir sem gagnast þeim þegar kemur að því að standa vörð um Heimsmarkmiðin. Þarna fóru fram afar merkilega umræður þar sem ungmennin lögðu línunar að bættum heimi fyrir alla og tók forsetafrúin þátt í þeirra vinnu með nemendunum. Þegar kennslustund var lokið kom Lilja D. Alfreðsdóttir mennta- og menningamálaráðherra og veitti viðurkenningu til þeirra skóla sem fyrstir á Íslandi taka þátt í UNESCO skólanetinu. Ráðherra ræddi þá við nemendur um hvað hefði staðið upp úr í kennslustund þeirra og hvatti þau til dáða.

Í tilefni dagsins bættum við inn fimm nýjum Heimsmarkmiða kennslustundum á skólavef okkar ásamt því að setja þar inn textað myndband sem sýnir fram á einfaldan hátt hvað við getum sem einstaklingar gert til að standa vörð um Heimsmarkmiðin og vinna að framgangi þeirra, myndbandið má nálgast hér.

Á sama tíma tók félagið þátt í viðburði Festu – miðstöð um samfélagslega ábyrgð þar sem Heimsmarkmiðin voru kynnt fyrir áhugasömum fyrirtækjum. Þar tóku saman höndum verkefnastjórn Heimsmarkmiðana sem stýrt er af forsætisráðuneytinu og Festa og kynntu þau tækifæri sem felast í Heimsmarkmiðunum þegar kemur að samfélagslegri ábyrð fyrirtækja. Um fundarstjórn sá Þröstur Freyr Gylfason formaður Félags Sameinuðu þjóðanna. Upptökur af viðburðinum má nálgast á facebook síðu Festu, hér.